Sa dalawang nag-iibigan, halimbawang kapwa sila nagkamali, sino ang unang dapat bumati at manuyo upang mawala ang alitan o tampuhan: Lalaki o Babae?
BASAHIN ANG MGA KATWIRAN AT KOMENTO
Mag-email ng iyong KATWIRAN o ng iyong KOMENTO tungkol sa paksang ito.
BASAHIN ANG MGA KATWIRAN AT KOMENTO
Magmungkahi ng paksa
LALAKI ANG DAPAT MAUNA
ReplyDeleteMalaon nang inilibing sa limot ng alaala
Ang panulat na luma na’t si ama pa’ng nagpamana
Hanggang dito’y masumpungan ang usaping humalina
At gumising sa damdaming akala ko’y pumanaw na.
Sa dalawang magsing-irog na kapuwa nagkamali
Kung ako ang tatanungin, ang sagot na ipapakli
Lalaki ang nararapat na mauna sa pagbati
Upang tampo at alitan ay kaagad na mapawi.
Lalaki sa mula’t mula ay syang unang nanunuyo,
Nanliligaw, nagtatapat, nagsisilbi, nang-aamo
Kaya kung kapwa may mali, sa akin ay tamang lalo
Na lalaki ang mauna sa pagluhod at pagsuko.
Sa sandaling gaya nito mas higit na nasusukat
Ang pagsinta ng lalaki sa babaeng nililiyag
Sumapit man ang sandaling ikasal na’t magkaanak
Lalaki’y di mambubugbog magkasala man ang kabyak.
BABAE ANG DAPAT MAUNA
ReplyDeleteAko muna’y pasintabi sa naunang nangatwiran
Palagay ko hindi dapat kung kapwa may kasalanan
Na lalaki ang maunang babati sa kanyang hirang
Babae pag nahirati, lalaki ang nalintikan.
Payag na nga ang lalaki na manligaw at manuyo
Yamang ito’y nakagisnang ugali pa ng ninuno
Kulang na lang maglupasay, maglumuhod, magsumamo
Para kamtin sa babae ang oo’ng pinipintuho.
Sa probinsya na kung saan uso pa rin ang harana
Kailangang manilbihan kung liligaw sa dalaga
Mag-iigib, magsisibak ng kahoy at maglalaba
Sakripisyong tinitiis alang-alang sa pagsinta.
At okey lang ang magtiis, magtiyaga sa simula
Kasabihan, kung may tyaga kakamtin daw ang nilaga
Ngunit kapag magsyota na o kasal na sa dambana
Babae na ang sya namang dapat na magpakumbaba.
Kaya ako’y di sang-ayon kay katreena’ng ipinayo
Na sa twinang may tampuhan, lalaki ang manunuyo
Sa larangan ng pag-ibig, hindi dapat maging dungo
Aabuso ang babae kung lalaki’y utu-uto!
DAPAT MAUNA ANG MAY MAS MALAWAK NA PANG-UNAWA
ReplyDeletekung sino sa kanila ang mas malawak ang pang-unawa…. hindi dapat batayan ang gender para lang manumbalik ang kinang ng kanilang relasyon…. kung talagang nagmamahalan sila hindi dapat maghintayan kung sino ang unang babati at manunuyo lalo na kung pareho silang may kasalanan.
PAGLILINAW SA PAKSA
ReplyDeleteIsa itong paglilinaw sa nakasalang na paksa:
Kung sasagot ay sagutin ang tanong na nakatakda
Dalawa lang ang pupwedeng pagpilian sa pagtaya…
Lalaki ba o babae? Walang panig na panggitna.
Sa tunay na buhay natin, hindi ganyan ka-white and black
Kadalasan, “Depende Yan!” ang sagot na mas matapat
Ngunit ito’y BlogTalasan, labanan ng mauuutak
Sa gipitan masusubok ang totoong may binatbat!
Kaya nga po sa usapan kung kayo rin ay sasali,
Sa dalawang magsinggiliw, halimbawang kapwa guilty,
Sino ang dapat maunang babati at magso-sorry?
Dito lamang po pipili: Babae ba? o Lalaki?
NASAAN ANG PANGAKO?
ReplyDeleteSalamat kay Royal Blogger sa katwirang inilatag
Ang katwiran ay katwiran mapamali, mapatumpak
Sa akin lang di masama kung lalaki ang magbahag
At mauna sa babae sa paghingi ng patawad.
Karamihan sa lalaki, mabait lang pag may gusto
Kung makuha na ang nasa, lumulutang ang totoo.
Sa pag-ibig, lalo na kung isa’t isa ay may tampo
Ang lalaki’y lalong dapat maging isang maginoo.
Sa bulaklak at bubuyog ihahambing ang dalawa
Kung bubuyog di maingat bulaklak ay malalanta.
Lalaking nagmamatigas hindi wagas ang pagsinta
Ang totoong minamahal ay sarili lamang niya.
Ang pangako ay nasaan nu’ng panahong nanliligaw
Na langit ay liliparin? Sisirin karagatan?
Matatayog na salitang wala palang katuturan
Kung babae’y titikisin sa kaprasong tampuhan lang.
LALAKI DAPAT ANG NAGDADALA
ReplyDeleteNakasalang na paksa ay talagang nakakaaliw,
Tambak man ang trabaho, gawain ay nakakabaliw,
Hindi maiwasang ipagtanggol ang aking ginigiliw,
Ipahayag, ipabatid pag-ibig na walang maliw!
Sa pipiliin kong panig, magagalit ang barako,
Ngunit pipiliting maitaas yaring bandila ko;
Sa pagharap sa buhay, sa pag-ibig at sa pagsuyo,
Batas at aral ni Butsikik ang pagkamaginoo!
Sa isang relasyon, lalaki dapat ang nagdadala,
Mas malakas, mas matatag, mas makulay, mas masaya;
At dahil may karapatang mas masunod ang mga pasya,
May katungkulan ding mag-ayos ng mga diperensya.
Oo nga’t si Eba ay hinugot sa tadyang ni Adan,
Lahat ng sumunod na lalaki’y may inang pinagmulan,
Gusto ko lang maipakita at maisalarawan;
Espesyal ang babae at dapat pangalagaan.
Kung parehong may kasalanan, may tensyong nabubuo
Bumalik sa basic, ayusin, mag-umpisa ng bago;
At saan ba nag-umpisa ang matamis na pagsuyo?
Kundi sa lalaking mapagmahal, mahusay magsumamo!
Kung gustong patunayan lakas, tatag, tibay at tapang,
Ng isang kabalyerong nasa gitna ng tampuhan
May hihigit pa bang patunay ng kadakilaan?
Pag-amin sa mali, pagtutuwid, pagtuloy ng suyuan!
LALAKI ANG HARI
ReplyDeleteNakakuha ng kakampi si Katreena kay Butsikik
Na hindi na nakatiis at nagkusa nang sumingit
Ngunit di rin nagbabago ang tanaw ko sa pag-ibig
Kung parehong mali, dapat, babae unang lalapit.
Kung palaging hahabulin, aamuin, pagbibigyan
Ng lalaki ang babae kung pareho lang nagkulang,
Para na ring kinunsinti si Babaeng pag nasanay
Magpakipot, magmalaki sa twing sila’y mag-aaway.
Kailangang ipakita ng lalaki na mahal nya
Ang babae ngunit dapat malinaw rin sa umpisa
Na lalaki ang syang hari at syang padre de pamilya
At siya ang nasusunod sa lahat ng pagpapasya.
Kung babae’y di susunod sa lalaking napusuan
At sariling pagpapasya ang susundin kung may away
Baka alam na ng byenan, kapitbahay at barangay
Ang problema ang kawawang si mister ay walang alam.
Hindi dapat ang ganito, kung may gusot ang dalawa,
Mas mabuting ang babae sa lalaki’y kumumpronta
Diretsahang ikumpisal kung naapi’t nasaktan sya
Sa halip na ipagsabi sa kung kani-kanino pa!
LALAYO, HINDI LALAPIT
ReplyDeleteMr. Royal Blogger, kaibang matuwid
Hindi yata masarap ang tunog ng iyong tinig
kung ang paraan mo sa babai ay ipipilit
lalayo at hindi lalapit, ang iyong iniibig
SURIIN ANG PUSO
ReplyDeleteKay makatang royalblogger na ugali’y makahari
Sa katwirang binitiwan, ina mo ang inaglahi
Ang nanay mo, tulad namin, babae ring magka-uri
Na dapat ay igalang mo kahit pa nga nagkamali.
Ang babaeng gaya namin ay mahina at marupok
Kayo namang malalakas ay matapang at mapusok
Kung parehong nagkasala sa sumpaang pinagbuklod
Higit naming kailangan ang pagsuyo ninyong handog.
Kung sa halip na pagsuyo ay tigas ng kalooban
At pasakit ang dulot mo sa babaeng napusuan
Suriin ang iyong puso at ang utak ay patingnan
Sapagkat ang nagmamahal nang tunay ay hindi ganyan.
PUNDASYON NG TAHANAN
ReplyDeleteTunay ako kung magmahal sa babaeng sinisinta
At gayundin sa iisa at dakilang aking ina
Masunurin akong anak sa nanay ko, ngunit siya
Na sa puso’y bibighani, dapat ako’ng sundin niya.
Kung kami ay ikasal na’t biyayaan ng Maykapal
Ng maraming mga anak, ano’ng aral ang iiwan
Kung sa tuwing mag-aaway ay kanilang masaksihan
Na ako pang ama nila ang mahina at talunan?
Ang babae’y iniibig, sinusuyo, minamahal
Binibigyan ng atensyon, tinataas sa pedestal
Ngunit may pagkakataong kailangang iparamdam
Na lalaki ang haligi at pundasyon ng tahanan!
ARAL SA MGA SUPLING
ReplyDeleteIkaw na rin, Royal Blogger, ang nagtanong sa pangaral
Na sa murang pag-iisip ng supling ay ikikintal
Sa twing may di-unawaan ikaw at ang minamahal
May takot na sumisibol sa puso ng kasambahay.
Amang hindi kumikibo sa inay na walang imik
Sa mata ng batang munti at musmos ang pag-iisip
May larawang matatanim sa diwang di maaalis:
Ang lalaki mapang-api, ang babae mapagtiis.
MAHAL, SAAN KA NANGGALING?
ReplyDeleteGanyan din ang iisipin ang tsismosang kapitbahay
At ng byenang binebeybi ang anak na kinampihan
Maski kaming lalaki na ang inapi sa tahanan
Babae pa ang syang martir sa oras na may tampuhan.
Pagod na nga sa maghapong pagkayod sa kikitain
Pag-uwi pa sa tahanan, pobreng mister ra-rat-ratin
Ni misis ng malisyosong ‘Mahal, saan ka nanggaling?”
At ng walang katapusang pagbibintang na nagtaksil!
KUNG TUNAY NA MAGINOO
ReplyDeleteOh Ginoong Royal Blogger, wag idamay ibang tao
Sa babae at lalaking kapwa galit o may tampo
Sino ang unang babati? Kung tunay kang maginoo
Ang sagot ay walang iba kundi ikaw na rin mismo.
Sinabi mong ang lalaki ay haligi ng tahanan
Ang haligi’y nararapat maging muog at sandigan
Ng babaeng kung talagang taus-pusong minamahal
Hindi dapat tinitikis kahit ikaw’y nagdaramdam.
KAHIT BANAL DI TATAGAL
ReplyDeleteAng lalaki pag nagdamdam ay madaling magpalipas
Lalo na kung labis-labis ang pag-ibig sa kapilas
Ngunit kahit santong banal di tatagal at kakalas
Sa babaeng walang kibo, walang imik pag nagbargas.
Alalaong baga’y sana, kung may tampo o hinaing
Wag lang basta manahimik; si mister ay konsultahin
At lalong wag ipagsabi sa iba ang suliranin
Na kung kelan malala na’y lalaki pa’ng sisisihin!
LAGING WALA
ReplyDeletePa’nong hindi mauuna ibang tao sa pagdamay
Ang lalaki pirming wala sa sariling pamamahay
Hatinggabi kung umuwi, lasing at hahapay-hapay
Di ka pa nga umiimik, may ganti nang bulyaw, sampal.
ATUBILI SA PAG-UWI
ReplyDeleteSinong pagod sa trabaho ang di kaya maturete
Kung sa halip kumustahin, “Gutom na ba aking Honey?”
Dinig sa kanto ang sermon ni Babae kay Lalaki
Kaya ayaw nang maglagi sa bahay at naririndi!
SALA SA INIT, SALA SA LAMIG
ReplyDeleteSala sa init at lamig ang lalaki kapag ganyan
Umimik ka’t manahimik, ikaw rin may kasalanan.
PUSONG MAMON
ReplyDeleteLalaki ay pusong mamon kung babae’y marunong lang
Na maglambing at maunang aamin sa pagkukulang!
SINUSUYO
ReplyDeleteBabae ang sinusuyo, lalaki ang nanliligaw.
SINUSUNOD
ReplyDeleteLalaki ang nasusunod bilang puno ng tahanan!
MALING URI
ReplyDeleteMaling uring pagmamahal…
PAGGALANG
ReplyDeleteIgalang ang aming dangal!
PAGWAWAKAS
ReplyDeleteAko muna’y papagitna, Royal Blogger at Katreena
Kapwa kayo may katwiran panig man ay magkaiba
Sa magiting na pagtudla at mahusay na pagsangga
Pasalamat nang marami ang handog ko’t ng balana.
Sa iba pang nagnanais na magbigay ng opinyon,
Patula man o hindi na, tatanggapin pa rin ngayon
Mag-log in lang saka i-post ang komentong nauukol
At abangan ang pag-approve ng lingkod nyong moderator.
Muli aking paalala sa tutunghay sa blog na ‘to
Bawat tao ay may kanyang personal na kurukuro
Mahalaga, kahit munti, tayong lahat ay natuto
Pulutin lang ang mabuti, ang masama iwan ninyo.